Urriaren 4ean, Beskoitzeko ikastolak & Seaskak prentsaurrekoa egin zuten Herriko Etxearen jarrrera salatzeko
Julen JAUREGUY eta Cyril FESQUINE Beskoitzeko Ikastolako koolehendakariak
2022ko uztailaren 22an, prentsa gomitatu genuen Beskoitzeko ikastolaren egoera azaltzeko. Hamar urte baino gehiago prefabrikatu prekarioetan eman ondoren, Herriko Etxeak uko egiten zion lanak bere gain hartzeari, eta errefusatu zigun -neholako eztabaidarik gabe-, ikastolaren ondoan zegoen erabili gabeko herriko gela baten alokatzeari. Egoera horren aitzinean, Herriko Etxeari proposatu genion eraikuntza gure gain hartzea alokatzen zigun lur eremuan, gisa horretan ikastolaren garapena segurtatzeko.
Hilabete luzez erantzunik ukan gabe egon ondoann, 2022ko uztailaren 7an, Herriko Etxeak mezu elektroniko bat igorri zigun eraikuntza baten alde zegoela jakinaraziz, baina aurkeztutako proiektuaren aldaera ezberdinak ukatzen zituen, eta batez ere, 50 ikasle baino gehiago har zitzakeen ikastola baten eraikitzeari uko egiten zion, jadanik haur kopuru hori gainditzen ari ginelarik.
Gurasoen haserrearen ondotik, Fabienne Ayensa auzapez andereak 2022ko urrian herriko aldizkarian izkiriatzen zuen: "hautetsiak eraikuntza batendako permisa pausatzearen zain dira, Seaskak finantzatua, gaur egun okupatua den lurraren mugetan, 50 haurrentzat egokia izan daitekeena".
2022ko urrian berean, Seaskak ikastola ondoko lur eremu baten alokatzea deliberatu zuen, ikastolaren kanpoko eremua handitzeko eta herriko etxearen kezkei erantzuteko. Auzapez anderearekin trukatu ondoan, Seaskak baimen proiektuaren lehen zirriborro bat aurkeztu zuen 2023ko urtarrilean, eta ondotik permisa pausatu otsailaren 23an. Permisan, ikastola berria Herriko Etxeari alokatua den lurraren perimetroan eraikitzea aurreikusten zen, eta kanpoko espazioa auzoari alokatua zitzaion lur eremuan antolatzen zen, horrela, 50 ikasle baino gehiago har zitzakeen baldintza onargarrietan.
Herriko etxeak probokazio bat egin bazuen ere, 2023ko urtarrilean ikastolako 55. ikaslea herriko jangelan ukatuz, ikastolak egoera lasaitzea deliberatzen zuen, eta negua bukatzean ikastolan eta herriko hainbat lekutan hedatuak ziren pankartak kendu zituen, permisaren instrukzioa errazteko. Eginahalak egin arren, 2023ko udan berriz aipatzen hasi ziren ikastolako haurrak ukatzea kantinan. Gurasoek beste behin uko egin zioten konfrontazioari, permisaren tramitazioa ez trabatzeko.
2023ko martxoaren 22an, herriko etxeko zerbitzu instruktoreek pieza osagarrien eskaera bat egiten zuten, baimenaren gai teknikoei buruz haiekin mintzatzera gomitatuz. Baina ez zen beste elgarrizketarik izan ondotik, Herriko Etxeak ez baitu bilkura eskaerarik onartu. Pieza osagarriak utzi ditu arkitektoak maiatzean, elgarrizketarik izan gabe.
Ekainean, Auzapez anderea eritu baitzen, Patrick Elizagoyen lehen axuantari eman zizkion ahalak. Arkitektoak eta Seaska behin eta berriz entseatu ziren harekin hitzordu bat lortzen. Hainbat entseuren ondoren, Seaskako lehendakariak herriko etxeari idatzi zion agorrilean hitzordu baten eskatzeko, eta Elizagoyen jaunaren erantzuna izan zen hirigintza kodeak ez duela trukerik aurreikusten permisaren instrukzioan.
Elkarrizketa ukatze horren eta fede txar horren aitzinean, arkitektoak 2023ko irailaren 15ean eskatu du teletransmisio gunearen irekitzea, pieza osagarri berriak uzteko. Herriko etxeak, sarbidea irekitzeari uko egin dionez, arkitektoak dokumentu osagarriak posta ziurtatuz igorri ditu irailaren 18an, eta irailaren 21ean errezibituak izan dira Herriko Etxean. Egun berean, pieza osagarriak kontuan hartu gabe, eta presaka, Herriko Etxeak eraikitze baimena ukapena afixatu du (erantzuteko epea urriaren 22a arte bazuelarik), gure pieza osagarriek zuzentzen zituzten elementuak banan-banan zerrendatuz, baina ekarriak ziren zuzenketak kontuan hartu gabe! Are larriagoa dena, Herriko Etxeak dio ez dugula jabearen baimenik permisa pausatzeko, hau da, ez digula baimenik eman permisaren pausatzeko ! Nori jo nahi diote adarra ?
Nahiz eta 2022ko uztailaren 7ko e-mailean Herriko Etxeak zion hautetsi guziak eraikuntza gogor baten alde zirela, nahiz eta auzapez anderearen Herriko Etxea lur horretan eraikitzeko baimen baten pausatzearen zain zegoela erran, hilabeteak eta hilabeteak iragan ondoan, arkitekto bat kontratatu, ondoko lur eremu bat alokatu gunea handitzeko, eta izigarriko denbora iragan baimen horrekin, Herriko Etxeak erraten digu orain ez dugula baimenik lur eremu horretan, bere lurretan, baimen baten pausatzeko! Beraz, Hitza-Hitz erranaldiak zer balio du Auzapez anderearentzat eta Beskoitzeko herriko taldearentzat ?.
Gauzak argi dira orain. Herriko Etxeak nahi du ikastola ustel dadin prefabrikatuetan, ez du eraikuntza gogorrik nahi, ez du nahi gure haurrak gela duinetan eskolatuak izan daitezen. Herriko Etxeak ikastola oztopatu nahi du, katea motzean nahi gaitu, Beskoitzen euskararen garapena trabatzeko. Baina ez dugu amore emanen!
Ez, ez dugu amore emanen. Herriko Etxeari galdegiten diogu bilkura bat antola dezan 15 egun barne, urriaren 20a aitzin, Beskoitzeko ikastolaren garapenari aterabide bat bilatzeko. Euskal Herriak ez ditu gehiago onartuko euskara eta ikastolen garapena oztopatzen saiatuko diren hautetsiak. Aterabiderik gabe, Ayensa andereak, Elizagoyen jaunak, ez dituzue Beskoitzeko ikastolako gurasoak aitzinean ukanen soilik, ikastola guztiak eta euskal gizartea izanen dira euskararen laguntzera joanen direnak, hemen Beskoitzen eta euskararen garapena mehatxatua izanen den toki orotan.
Euskarak ezin du atzera egin, aitzina egin dezakeen tokian. Klase politiko guziari laguntza eskatzen diogu ere Beskoitzeko hautetsiak arrazoibidera ekartzeko. Euskal Herriko hizkuntza politika da Beskoitzen jokatzen dena
